नेपाल विज्ञान तथा प्रविधि प्रज्ञा प्रतिष्ठान (नास्ट) ले नेपालका सरकारी वा गैरसरकारी कार्यालयहरूमा कार्यरत तथा अन्यत्र छरिएर रहेका विज्ञान तथा प्रविधि (प्राकृतिक विज्ञान, कृषि विज्ञान, चिकित्सा शास्त्र, इन्जिनीयरिङ, गणित, सूचना प्रविधि आदि) विषयहरूबाट विद्यावारिधी प्राप्त वा सो सरह नेपाली वैज्ञानिक एवं विद्यावारिधी सकेर विदेशमा रहेका नेपाली वैज्ञानिक एवं प्राविधिकहरूको यथार्थ विवरण सङ्कलन गर्ने उद्देश्यले ‘हु इज हु इन साइन्स एन्ड टेक्नोलोजी डिरेक्टरी’ प्रकाशन गर्ने कार्यको थालनी यसै वर्षदेखि सुरु गरेको छ ।
 
उक्त ‘डिरेक्टरी’ प्रकाशनार्थ आवश्यक तथ्याङ्क सङ्कलन गर्न नास्टले आफनो होमपेज www.nast.gov.np भित्र प्रवेश गरी ‘हु इन हु लिङ्क’ मार्फत फारम भर्न सकिने व्यवस्था गरेको छ ।

यसै सन्दर्भमा नास्टको उक्त कार्यक्रमलाई प्रभावकारी बनाउन र कार्यक्रमको उद्देश्यमाथि थप प्रकाश पार्न नास्टको प्रतिनिधित्व गर्दै ‘डिरेक्टरी’ प्रकाशन समितिका सदस्य एवं नास्टका वैज्ञानिक अधिकृत डा. तीर्थराज घिमिरे र प्रकाशन समितिका सदस्य सचिव एवं नास्टका प्रवर्द्धन अधिकृत ज्योतिप्रसाद फुयालको संयोजनमा हालै कृषि तथा वन विज्ञान विश्वविद्यालय रामपुरमा एक कार्यक्रमको आयोजना गरियो ।

कार्यक्रममा विश्वविद्यालयका उपकुलपति प्रा डा. शारदा थपलियाले नास्टद्वारा सुरु गरिएको ‘डिरेक्टरी’ ले राजधानीबाहिर रहेका वैज्ञानिक एवं प्राविधिकहरूमा रहेको विज्ञता चिनाउन सहयोग पुग्ने बताए । उनले प्रकाशोन्मुख ‘डिरेक्टरी’ केवल एक वर्षका लागि मात्र प्रकाशित नगरी प्रत्येक वर्ष अद्यावधि गर्न सुझाव दिए । 

सहप्राध्यापक डा.निराजन भट्टराईले प्रकाशोन्मुख  ‘डिरेक्टरी’ मा वैज्ञानिक एवं प्राविधिकहरूले प्रकाशन गरेका कृतिहरूको विवरण पनि समावेश गर्दा अझ राम्रो हुने बताए।