वासिंगटनः पदको दुरुपयोग गर्दै गैरकानूनी काम गरेको आरोपमा अमेरिकी राष्ट्रपति डोनाल्ड ट्रम्पमाथि महाअभियोग लगाउनका लागि पर्याप्त प्रमाण र आधार रहेको महाअभियोग लगाउने सम्बन्धी अनुसन्धानको नेतृत्व गरिरहेको संसदीय समितिले सार्वजनिक गरेको छ ।

महाअभियोग लगाउने सम्बन्धी अनुसन्धान गरिरहेको अमेरिकी तल्लो सदनको समितिले तयार पारेको प्रतिवेदनमा राष्ट्रपति ट्रम्पले अमेरिकाको राष्ट्रिय स्वार्थभन्दा बढी आफ्नो व्यक्तिगत राजनीतिक स्वार्थलाई महत्व दिएको उल्लेख छ ।
राष्ट्रपति ट्रम्पले आउँदो वर्ष सन् २०२० मा हुने राष्ट्रपति चुनावमा फेरी निर्वाचित हुनका लागि आफ्नो पक्षमा सहयोग गर्नका लागि युक्रेनलाई महिनौँदेखि आग्रह गरेको सो प्रतिवेदनमा उल्लेख छ ।

ट्रम्पले आफ्नो व्यक्तिगत स्वार्थका लागि विदेशी शक्तिलाई अमेरिकाको आन्तरिक राजनीतिमा अवैध तवरले प्रभावित पार्न आग्रह गरेको प्रतिवेदनमा उल्लेख गरिएको अमेरिकी सञ्चारमाध्यमले जनाएका छन् ।

ट्रम्पले भने आफूले कुनै पनि किसिमले गैरकानूनी गतिविधि नगरेको दावी गर्दै आएका छन् । अनुसन्धान सम्बन्धी ड्राफ्ट प्रतिवेदन सार्वजनिक हुनु अघि राष्ट्रपति ट्रम्पले डेमोक्राटिक पार्टीको नेतृत्वमा भइरहेको अनुसन्धानको आलोचना गरेका थिए । उनले अनुसन्धानलाई ‘अति अराष्ट्रवादी’ को शंज्ञा दिएका छन् ।

रिपब्लिकन पार्टीका तर्फबाट उम्मेदवार बनेका ट्रम्प सन् २०१६ मा डेमोक्राटिक उम्मेदवार हिलारी क्लिन्टनलाई पराजित गर्दै राष्ट्रपति बनेका थिए ।

प्रतिवेदन सार्वजनिक भएपछि ह्वाइट हाउसका प्रवक्ताले प्रतिवेदनमा राष्ट्रपति ट्रम्पले कुनै गलत गरेको भन्ने देखाउने प्रमाण नरहेको र त्यसले उनीहरुको कुण्ठा मात्रै झल्काउने बताएका छन् । ट्रम्पमाथि शक्तिको दुरुपयोग, न्याय प्रक्रियामा अवरोध र सदनलाई बेवास्ता वा निन्दा गरेको सहितका आरोपमा महाअभियोगको लगाउने तयारी छ । राष्ट्रपति ट्रम्पले निहित स्वार्थ या शर्त राखेर युक्रेनलाई दिँदै आएको सैन्य सहायता रोकेको आरोप छ । त्यसकै लागि अनुसन्धान भइरहेको हो । राजनीतिक स्वार्थका लागि विदेशी शक्तिको सहयोग खोज्नु अमेरिकामा गैरकानूनी मानिन्छ ।

ट्रम्पले युक्रेनका राष्ट्रपति भोलोडिमिर जेलेन्स्कीलाई पूर्व अमेरिकी उपराष्ट्रपति जो बाइडेन तथा उनका छोरा हन्टर बाइडेनमाथि भ्रष्टाचार आरोपमा छानबिन सुरु गर्न आग्रह गरेका थिए । त्यसकै लागि ट्रम्पले युक्रेनलाई दिइँदै आएको सैन्य सहयोग रोकेको र यसले ट्रम्पलाई व्यक्तिगत रुपमा राजनीतिक लाभ हुने आरोप छ ।

जो बाइडेन आउँदो वर्ष हुने राष्ट्रपति चुनावमा डेमोक्राटिक पार्टीका तर्फबाट उम्मेदवार बन्ने होडमा छन् र उनलाई प्रमुख दाबेदार मध्ये एक ठानिएको छ ।