क्यानडाका प्रधानमन्त्री जस्टिन टुडोकी पत्नी सोफीमा कोरोना भाइरस संक्रमण देखिएको त्यहाँको स्वास्थ्य मन्त्रालयले पुष्टि गरेको छ । सोफीसँगै उनका पति प्रधानमन्त्री जस्टिन पनि आइसोलेसन वार्डमा रहेन बताइएको छ । उनले त्यहीँबाट कामकाज सम्हाल्ने त्यहाँका सञ्चारमाध्यमहरुले बताएका छन् ।
यसैबीच कोभिड १९ बाट संसारभरि मृत्यु हुनेको संख्या ४ हजार ९ सय ८४ पुगेको छ । एक लाख ३४ हजारभन्दा बढीमा यो यसको संक्रमण पुष्टि भइसकेको अन्तराष्ट्रिय सञ्चारमाध्यमहरूले जनाएका छन् ।
यसैगरी स्पेनका मन्त्री इरेन मोरेटोमा पनि संक्रमण देखिएको स्पेनी समाचार संस्थाहरुले जनाएका छन् । मन्त्री मोरेटोमा संक्रमण पाइएपछि उनी र उनका साथीका साथै त्यहाँ कार्मेन काल्बोलाई पनि आइसोलेसन वार्डमा राखिएको छ ।
त्यहाँको सरकारले सबै मन्त्री तथा अधिकारीहरुलाई कोरोना संक्रमण भए नभएको बारे तत्काल जाँच गर्न पनि भनेको छ । हालसम्म स्पेनमा ५५ जनाको यस संक्रमणबाट मृत्यु भइसकेको र दुई हजार दुई सयमा जनामा यो संक्रमण देखिएको बताइएको छ ।
यसैबीच इटालीमा संक्रमणका कारण मर्नेको संख्या बढेको एजेन्सीहरुले बताएका छन् । शुक्रबारसम्म इटालीमा मर्नेको संख्या एक हजार १६ पुगेको त्यहाँका सञ्चारमाध्यमहरुले बताएका छन् ।
इटालीमा १५ हजार एक सय १३ जनामा संक्रमण पाइएको छ । चीनपछि सबैभन्दा बढी इटाली र इरानमा कोरोना संक्रमणका कारण मानिसको ज्यान गएको छ । इटालीमा एक हजार दुई सय ५८ जना उपचार पाएर घर फर्किसकेका छन् ।
