एजेन्सी । श्रीमतीसँग विवाद भएपछि श्रीमानले आफ्ना तीन बच्चालाई नहरमा फालिदिएका छन् ।
माइतबाट श्रीमती लिएर घर फर्किने क्रममा श्रीमान–श्रीमतीबीच विवाद उत्पन्न भएपछि रिसको झोकमा श्रीमानले तीन बच्चालाई नहरमा फालिदिएका हुन् ।
नहरमा डुबेर चार वर्षका छोरा र डेढ वर्षकी छोरीको मृत्यु भएको छ भने ६ वर्षीया छोरी बेपत्ता भएकी छिन् । उनको खोजी भइरहेको छ ।
भारत मध्यप्रदेशको ग्वालियरस्थित करहिया थाना क्षेत्रमा सोमबार साँझ साँढे पाँच बजे यो घटना भएको हो ।
बच्चाहरुलाई नहरमा फालिसकेपछि उनले श्रीमतीमाथि पनि कुटपिट गरेको स्थानीयले बताएका छन् ।
दुई जनाबीच झगडा भएको देखेपछि स्थानीयले महिलाको उद्दार गरेर उनका श्रीमानलाई प्रहरीको जिम्मा लगाइदिएका थिए ।
प्रमोद कुशवाह सोमबार ससुराली गएका थिए । माइतमा रहेकी श्रीमती पूनम कुशवाह र तीन बच्चासहित साँझ घर फर्कदै थिए ।
बाटोमा श्रीमान श्रीमतीबीच घरायसी कुरामा विवाद उत्पन्न भएपछि रिसको झोकमा प्रमोदले ६ वर्षकी छोरी सिमर, चार वर्षका छोरा प्रशान्त र डेढ वर्षकी छोरीलाई हरसी हाइलेभल नहरमा फालिदिएका हुन् ।
