एजेन्सी । संसारभर कोरोना भाइरसको महामारी फैलिएको छ । नेपाल भारत लगायत केही देशमा लकडाउन घोषणा गरिएको छ ।
अधिकांश देशहरुले हवाइ सेवा स्थगित गरेका छन् । विश्वभर कोरोना भाइरस संक्रमितको संख्या पाँच लाख ३६ हजारभन्दा बढी पुगिसकेको छ । २४ हजारभन्दा बढीले ज्यान गुमाइसकेका छन् ।
भारतमा पनि लकडाउन घोषणा गरिएको छ । लकडाउन पछि विभिन्न राज्यका मजदुर तथा दैनिक काम गरेर गुजारा चलाउनुपर्ने बाध्यता रहेका परिवार यतिबेला संकटमा छ ।
अहमदाबादेखि सांसवाडासम्म पुग्नको लागि एक दम्पती २५७ किलोमिटर पैदल यात्रामा छ ।
निरन्तर पैदल हिँड्दा श्रीमतीको खुट्टामा समस्या आएपछि श्रीमानले काँधमा बोकेर हिँडेका छन् । सवारी साधन बन्द भएपछि मानिसहरु हिँडेर आफ्नो गन्तव्यमा पुगिरहेका छन् ।
यसैबीच उत्तर प्रदेशमा प्रहरीले सर्वसाधारणलाई खाना खुवाउने व्यवस्था गर्यो ।
पश्चिम बंगालकी मुख्यमन्त्री ममता बनर्जी तरकारी बजारमा पुगेर ग्राहकको निम्ति उभिएर लाइन लगाउनको लागि गोलो घेरा बनाउँदै सोशल डिस्टेङसिङको बारेमा सम्झाइरहेकी थिइन् ।
