एजेन्सी । कोरोना भाइरस संक्रमण भएको आशंकामा अस्पताल भर्ना भएका एक व्यक्तिले आत्महत्या गरेका छन् ।
भारत, तमिलनाडुस्थित अरियालुर जिल्लाको एक सरकारी अस्पतालमा बिरामीले आत्महत्या गरेका हुन् ।
६० वर्षीय बिरामी अस्पतालको आइसोलेशन वार्डमा भर्ना भएका थिए ।
उनी केही समयअघि केरलबाट फर्किएका थिए ।
केरलबाट घर फर्किएपछि उनलाई ज्वरो र खोकी सुरु भएको थियो । त्यसपछि उनी अप्रिल ६ मा अस्पताल भर्ना भएका थिए ।
अप्रिल ७ मा कोरोना भाइरस संक्रमण भए-नभएको जाँच गर्न उनको नमूना लिइएको थियो ।
आफ्नो रिपोर्ट आउनुअघि नै उनले आत्महत्या गरेको अस्पतालले जनाएको छ । अस्पतालमा उनी निकै तनाबमा रहने गरेका थिए ।
आइसोलेशन वार्डमै उनले आत्महत्या गरेका हुन् । आजतकको खबरअनुसार, 'उनको रिपोर्ट भने कोरोना नेगेटिभ आएको छ ।'
प्रहरीले घटनाको बारेमा अनुसन्धान सुरु गरेको छ । आत्महत्याको पछाडि अन्य कारण भए नभएको विषयमा प्रहरीले अनुसन्धान गरिरहेको बताइएको छ ।
