काठमाडौं । पाँच हप्तादेखि जारी लकडाउनका कारण घरभित्रै बसिरहन बाध्य स्पेनका बालबालिका अब भने घर बाहिर निस्किन पाउने भएका छन् ।
स्पेन सरकारले २७ अप्रिलदेखि बालबालिकाहरुलाई बाहिर निस्किन दिने भएको हो ।
प्रधानमन्त्री पेद्रो सान्चेजले २७ अप्रिलदेखि लकडाउन केही खुकुलो बनाउने र बालबालिकाहरुलाई घरबाहिरको ताजा हावा लिन दिने बताएका छन् ।
प्रधानमन्त्री सान्चेजले बालबालिकालाई ताजा हावा लिन दिने भने पनि यससम्बन्धी विस्तृत योजना सार्वजनिक नभएको बीबीसीले उल्लेख गरेको छ ।
स्पेनमा कोरोना भाइरसबाट २० हजार बढीको मृत्यु भइसकेको छ भने झण्डै २ लाख मानिसमा संक्रमण पुष्टि भएको छ ।
स्पेनमा शनिबार एकै दिन ५ सय ६५ जनाको मृत्यु भएको छ । केही दिनयता स्पेनमा दैनिक मृत्यु हुनेको संख्या घट्दै गएको छ ।
