बीबीसी । नाइजेरियाको सरकारले कोरोनाभाइरस संक्रमण फैलन रोक्ने उद्देश्यसहित लागू गरेको लकडाउनको नियम उल्लंघन गर्ने रिभर्स राज्यका दुई होटल भत्काइदिएको छ ।
राज्यका गभर्नर न्येसोम वाइकीको रेखदेखमा इदिमेते होटल र प्रोडेस्ट नामका दुई होटल आइतबार भत्काइएका हुन् ।
त्यहाँका गर्भनरले लकडाउन अवधिभरी होटल खोल्न नपाउने नियम तोडेकोले यी दुई होटल भत्काउनुपरेको जानकारी दिए ।
कोभिड–१९ द्वारा संक्रमित बिरामी राज्यका विभिन्न होटलमा बसिरहेको भेटिएको उनले जानकारी दिए ।
यद्यपि, उनले भत्काइएका होटलमा संक्रमित बसे नबसेको भन्ने बारे जानकारी दिएनन् ।
दुबै होटलका म्यानेजरलाई पक्राउ गरिएको छ । यद्यपि, प्राडेस्ट होमका मालिकले भने आफ्नो होटल खुल्ला नरहेको दाबी गरे ।
‘होटल सञ्चालन गरिएकै थिएन र ७० प्रतिशत कर्मचारीलाई घर पठाइएको थियो,’ गोगोरोबारी प्रोमिस निदामले बीबीसीलाई भने ।
‘होटलमा जम्माजम्मी तीनजना व्यक्ति मात्रै थिए ।’
‘अधिकारी आए र घुसको माग गरे । उनीहरुले घुस दिए लकडाउनमा पनि होटल सञ्चालन गर्न दिने बताइरहेका थिए । तर हामीले होटल सञ्चालनमा नआएकोले घुस दिन आफूसँग पैसा नभएको बतायौं,’ उनले भने ।
रिभर्स राज्यका अधिकारीले यस्तो आरोप खण्डन गरे ।
यो राज्यमा १५ जना संक्रमित देखिएका छन् भने दुईजनाको मृत्यु भइसकेको छ ।
राज्यको राजधानी पोर्ट हाकोर्टमा गत बिहिबारदेखि लकडाउन घोषणा गरिएको थियो ।
पूरा नाइजेरियामा चार हजार बढी कोरोनाभाइरस संक्रमित छन् ।
