भारतमा कोरोना भाइरस (कोभिड–१९) बाट संक्रमित हुनेको संख्या दुई लाख ४६ हजार ६२८ पुगेको छ ।
संक्रमितको यो संख्या इटाली र स्पेनको भन्दा पनि बढी हो । योसँगै भारत कोरोनाबाट सबैभन्दा धेरै मानिस संक्रमित हुने मुलुकको सूचीमा पाँचौं स्थानमा उक्लिएको छ ।
भारतको स्वास्थ्य मन्त्रालयका अनुसार अहिलेसम्म भारतमा दुई लाख ४६ हजार ६२८ भन्दा बढी मानिस कोरोना भाइरसबाट संक्रमित भइरसकेका छन् ।
जोन्स हप्किन्स युनिभर्सिटीका अनुसार स्पेनमा अहिलेसम्म दुई लाख ४१ हजार ३१० जना संक्रमित फेला परेका छन् । त्यस्तै इटालीमा दुई लाख हजार ८०१ संक्रमित फेला परेका छन् ।
पछिल्लो २४ घण्टामा भारतमा कोरोना भाइरसका नौ हजार ९७१ नयाँ संक्रमित फेला परेका छन् ।
भारतमा कोरोना भाइरस संक्रमणबाट मृत्यु हुनेको संख्या पनि ६ हजार ९२९ पुगेको छ । पछिल्लो २४ घण्टामा मात्र भारतमा कोरोना भाइरसबाट २८७ जनाको मृत्यु भएको थियो ।
भारतको सबैभन्दा प्रभावित राज्य महाराष्ट्रमा अहिलेसम्म ८२ हजारभन्दा धेरै संक्रमित फेला परिसकेका छन् भने दुई हजार ९६९ जनाको मृत्यु भइसकेको छ ।
तामिलनाडुमा ३० हजारभन्दा धेरै मानिसमा कोरोना भाइरसको संक्रमण देखिँदा २५१ जनाको मृत्यु भइसकेको छ ।
राजधानी दिल्लीमा पनि २७ हजारभन्दा धेरै मानिसमा कोरानाको संक्रमण देखिएको छ भने ७६१ जनाको मृत्यु भइसकेको छ ।
भारतको बिहारमा चार हजार ९१५ जनामा कोरोना संक्रमण देखिँदा ३० जनाको मृत्यु भइसकेको छ । त्यस्तै उत्तर प्रदेशमा पनि नौ हजार ७३३ जनामा कोरोना भाइरसको संक्रमण देखिँदा २५७ जनाको मृत्यु भइसकेको छ ।
भारतमा अहिलेसम्म कोरोना भाइरसका एक लाख १९ हजार २९३ संक्रमित निको भएर घर फर्किसकेका छन् ।
