कोरोना भाइरस (कोभिड–१९) बाट सबैभन्दा धेरै ज्यान गुमाउने देशको सूचीमा मेक्सिको तेस्रो स्थानमा उक्लिएको छ ।
मेक्सिकोभन्दा अगाडि अमेरिका र ब्राजिल रहेको छ । पछिल्लो तथ्यांक अनुसार महामारी सुरु भएयता शुक्रबारसम्म मेक्सिकोमा ४६ हजार ६८८ जनाले ज्यान गुमाएका छन् ।
शुक्रबार एकै दिन ६८८ जनाको मृत्यु भएको थियो । ब्राजिलमा ४ लाख २३ हजार ६३७ जना संक्रमित रहेका छन् । यसअघि ४६ हजार २०४ मृत्युसहित सबैभन्दा धेरै ज्यान गुमाउनेको देशको सूचीमा तेस्रो स्थानमा बेलायत थियो ।
स्थानीय अधिकारीहरुले मेक्सिकोमा कूल संक्रमितको संख्या तथ्यांकमा देखिएभन्दा धेरै रहेको हुनसक्ने बताएका छन् ।
संक्रमितको संख्या बृद्धि भइरहँदा मेक्सिकोका राष्ट्रपति आन्द्रेस म्यानुएल लोपेज ओब्राडोरले भने देशको अर्थतन्त्रलाई पुनः चलायनमान बनाउन आतुर छन् ।
उनको सरकारले मेमा चरणबद्धरुपमा लकडाउन खुला गर्ने योजना घोषणा गरेको थियो ।
मध्य जुनदेखि हजारौँ कामदारहरु काममा फर्किएका थिए । त्यस्तै जुलाईदेखि अन्य व्यवसायलाई खुला गर्ने अनुमति दिइएको थियो ।
आलोचकहरुले भने लकडाउन गर्न ओब्राडोरले ढिलाइ गरेको र अहिले लकडाउन खुकुलो बनाउन हतारो गरेको आरोप लगाएका छन् ।
यसैबीच, विश्व स्वास्थ्य संगठन (डब्लुएचओ) ले महामारीको असर दशकौँसम्म रहने चेतावनी दिएको छ ।
-बीबीसी
