सन् २०१८ मा भएको साउदी अरबका पत्रकार जमाल खशोग्गीको हत्या गरेको आरोपमा आठ जना प्रतिवादीलाई सात वर्षदेखि २० वर्षसम्मको जेल सजाय सुनाइएको छ ।
साउदी अदालतले सोमबार त्यस्तो फैसला गरेको त्यहाँको सरकारी सञ्चारमाध्यमले जनाएको हो ।
सार्वजनिक अभियोजन सेवालाई उद्धृत गर्दै साउदी प्रेस एजेन्सीले भनको छ, “अपराधीमध्ये पाँच जनालाई २० वर्ष जेल र अन्य तीनलाई सातदेखि १० वर्ष जेल सजाय दिइएको छ ।”
यस पहिले उक्त मुद्दामा साउदी अरबको एक अदालतले पाँच जनालाई मृत्यु दण्डको फैसला सुनाएको थियो ।
खशोग्गी छोराहरूले हत्यारालाई ‘माफी’ दिएको बताएको केही महिनापछि अदालतको अन्तिम फैसला आएको हो । उनीहरूले गत मे महिनामा आफ्ना पिता तथा अमेरिकी पत्रिका वासिङ्टनका लागि काम गरेका प्रसिद्ध साउदी पत्रकार खशोग्गीका हत्याराहरूलाई ‘माफी’ दिएको बताएका थिए ।
