अमेरिकी राष्ट्रपति पदका लागि डेमोक्रेटिक पार्टीका उम्मेदवार जो बिडेन राष्ट्रपति डोनाल्ड ट्रम्पले शान्तिपूर्ण रूपबाट सत्ता हस्तान्तरण गर्न अस्वीकार गरेपछि आक्रामक रूपमा प्रस्तुत भएका छन् ।
ट्रम्पले पत्रकार सामु बोलेको विषयलाई लिएर बिडेनले बुधवार नै प्रश्न उठाए, ‘हामी कस्तो मुलुकका बासिन्दा बनिरहेका छौँ ?’
‘मलाई हाँसो लाग्छ । मैले भने नि हामी कस्तो मुलुकको बासिन्दा बन्दै छौँ ? हेरौँ, उनी तर्कहीन विषय उठाउँदै छन् । मलाई थाहा भएन उनी किन यस्तो भनिरहेका छन्, म के भनौँ खै,’ बिडेनले चुनावका प्रारम्भिक सर्वेक्षणलाई आधार मान्दै भने ।
व्हाइट हाउसमा पत्रकारसँग कुरा गर्दै ट्रम्पले आगामी नोभेम्बरमा हुने राष्ट्रपतीय निर्वाचनमा हार व्यहोरेको खण्डमा शान्तिपूर्ण सत्ता हस्तान्तरणलाई अस्वीकार गरेका थिए । फेरि एक पटक मतदान प्रक्रियामा आशङ्का उब्जाउँदै ट्रम्पले सो कुरा बोलेका हुन् । कोभिड १९ का कारण उब्जिएको समस्याबाट आगामी नोभेम्बरमा हुने निर्वाचनमा बाधा नपरोस् भन्ने हेतुले कतिपय राज्यले नागरिकको सहुलियतका लागि घरबाट मतदान गर्न सक्ने व्यवस्था गरेका छन् । जसलाई मेल इन ब्यालेट भनिएको हो ।
‘के हुन्छ, तपाई हामीलाई थाहै छ तर मसँग मतपत्रका विषयमा निकै गुनासा छन् । मतपत्र विपत्ति हो,’ हारेको खण्डमा शान्तिपूर्ण रूपमा सत्ता हस्तान्तरण हुन्छ कि हुँदैन भन्ने प्रश्नमा ट्रम्पले स्पष्ट पारेका थिए । साथै उनले मेल इन ब्यालेट बिना सत्ता हस्तान्तरण हुन नसक्ने अवस्था सिर्जना गरिएको पनि बताए ।
‘म त भन्छु, हामीले मतपत्रबाट छुटकारा पाउनु पर्छ तथा यो शान्तिपूर्ण तरिका पनि हो... स्पष्टसँग भन्नु पर्दा अहिले सत्ता हस्तान्तरणको आवश्यकता पनि पर्दैन । हामीले निरन्तरता पाउने छौँ,’ ट्रम्पले भने, ‘मतपत्र त नियन्त्रण बाहिर हुन्छन् । यहाँलाई यो थाहै छ, यहाँहरूलाई थाहा नभए यस बारेमा अरू कसलाई राम्रोसँग थाहा हुन्छ त ? हो डेमोक्रेटले सबैभन्दा बढी बुझेका छन् ।’
साथै ट्रम्पले निरन्तर रूपमा मेल इन ब्यालेटले मतदाताहरूलाई भ्रममा पार्ने तथा चुनावमा धाँधली हुनसक्ने दाबी गर्दै आएका छन् । तर, चुनावी विशेषज्ञहरू भने मेलबाट गरिने मतदानमा धाँधली हुन्छ भन्ने बलियो प्रमाण अहिलेसम्म नभेटिएको दाबी गर्छन् ।
ट्रम्पको यस्तो भनाइपछि बुधवार रातिदेखि चर्को रूपमा सार्वजनिक बहस भइरहे पनि उनको पार्टी रिपब्लिकनका मात्र एक जना सिनेटर मिट रोम्नीले ट्रम्पको नाम नलिईकनै विरोधमा ट्विट गरेका छन् । रोम्नीले शान्तिपूर्ण सत्ता हस्तान्तरण ‘प्रजातन्त्रको मौलिक आधार’ रहेको ट्विट गरेका छन् ।
