अमेरिकाको न्युर्योकस्थित एक अस्पतालभित्र गोली चलेको छ ।
न्युर्योकको म्यानहट्टनमा रहेको एक अस्पतालभित्र गोली चलेको न्युर्योक पोस्टले उल्लेख गरेको छ ।
गोली चलाएपछि केही घण्टासम्म बाथरुममा लुकेर बसेका ती बन्दुकधारीलाई त्यहाँको प्रहरीले पक्राउ गरेको छ ।
६५ वर्षका यी व्यक्तिले बिहीबार राति पौने नौ बजेतिरको समयमा इस्ट ६७ स्ट्रिटस्थित मोमोरियल स्लोआन केटरिङ अस्पतालको अर्जेट केयरमा गोली चलाएको अधिकारीहरुले बताएका छन् ।
अधिकारीहरुका अनुसार उनले ५/६ पटक फायर गरेका थिए ।
घटनापछि मध्यरातअघि नै उनलाई हिरासतमा लिइएको र छानविन चलिरहेको प्रहरीले जनाएको छ ।
प्रहरीका अनुसार यस घटनामा कोही घाइते भएको विवरण भने प्राप्त भएको छैन ।
यसअघि बुधबार वासिङटन डिसीस्थित केपिटोल हिलमा रहेको संसद् भवनमै गोली चलेको थियो । उक्त घटनामा चार जनाले ज्यान गुमाएका छन् ।
भवन घेर्न गएका राष्ट्रपति ट्रम्पका समर्थकहरुले संसद् चलिरहेका बेला हलभित्र छिरेर हुलदंगा मच्चाएका थिए ।
जसकारण, निर्वाचन मत परिणाम प्रमाणिकरण गर्ने कार्य केही घण्टा रोकिएको थियो ।
पछि प्रदर्शन साम्य भएपछि फेरि बसेको संसद् बैठकल गत नोभेम्बरको निर्वाचन परिणाम सदर गर्दै जो बाइडेनलाई आगामी कार्यकालका लागि राष्ट्रपति चयन गरेको छ ।
जनवरी २० मा नवनिर्वाचित राष्ट्रपति बाइडेनले पदको सपथ लिनेछन् ।
