आगामी ३१ अगस्टबाट अफगानिस्तानमा अमेरिकाको सैन्य अपरेशन समाप्त हुँदैछ । अमेरिकी सैनिकहरु धमाधम घर फर्कन थालिसकेका छन् ।
सेनाको बर्हिगमन तिव्र गतिमा भइरहेको भन्दै अमेरिकी राष्ट्रपति जो बाइडेनले यसको कार्यको प्रशंसा गरेका छन् ।
तर यति नै बेला तालिवानले अफगानिस्तानका गाउँहरु कब्जामा लिन थालेपछि त्रासकाे वातावरण सिर्जना भएको छ ।
बाइडेनले भने आफ्नो निर्णयको बचाउ गरेका छन् ।
सधैं अशान्त अफगान
अफगानिस्तान युद्ध सुरु भएयता अमेरिकामा चार राष्ट्रपति फेरिए पनि अमेरिकी सैनिकहरु अझै अफगानिस्तानमा छन् । सन् २००१ मा जर्ज डब्ल्यू बुसको नेतृत्वमा युद्ध सुरु भएको थियो ।
त्यसयता बाराक ओबामा र डोनाल्ड ट्रम्प सेना फिर्ता गर्न असफल रहे । यद्यपी, ट्रम्प कार्यकालमै सेना फिर्ता गर्ने विषयमा तालिवान सँग सहमति बनेको थियो , त्यस सहमतिमा मेइ २०२१ सम्म सेना फर्काउने विषय उल्लेख थियो ।
बाइडेन राष्ट्रपतिमा चुनिएपछि उनले नयाँ समयसीमा तोके । जसअन्तर्गत ११ सेप्टेम्बरमा सेना फर्काउने बताइएको थियो । तर अहिले त्यसलाई लम्ब्याएर ३१ अगस्ट पुर्याइएको छ ।
