मान्म । कालीकोटको पलाँता गाउँपालिकाबाट एक गर्भवती महिलाको हेलिकप्टरमार्फत उद्धार गरिएको छ ।
पलाँता गाउँपालिका-७ पारौटीका ४० वर्षीया जयपुरा बमको स्थानीय स्वास्थ्यचौकीमा उपचार हुन नसकेपछि राष्ट्रपति महिला उत्थान कार्यक्रममार्फत् शुक्रबार बेलुका उद्धार गरिएको हो ।
सुत्केरी ब्यथा लागेपछि उनी स्थानीय स्वास्थ्यचौकीमा पुगेकी थिइन् । तर त्यहाँ शिशु जन्मिन नसकेपछि थप उपचारका लागि हेलिकप्टरमार्फत उद्धार गरेर सुर्खेत लगिएको स्वास्थ्य केन्द्रका स्वास्थ्य शाखा प्रमुख हिमाल सन्ज्यालले जानकारी दिए ।
बमको स्वास्थ्य अवस्था जटिल देखिएकाले सुविधा सम्पन्न अस्पतालमा उपचारका लागि लगिएको पलाँता गाउँपालिका स्वास्थ्य शाखा प्रमुख विनोद न्यौपानेले बताए ।
‘उहाँको शरीरमा रगतको मात्रा कमी देखिएको छ । स्वास्थ्य अवस्थासमेत कमजोर छ,’ न्यौपानेले भने, ‘पाठेघरमा जटिल समस्या देखिएको कारण उद्धार गरी सुर्खेतस्थित प्रदेश अस्पताल पठाएका छौँ ।’
