एजेन्सी । लिभरपुलले इंग्लिस प्रिमियर लिग फुटबलमा १९ अंकको स्पष्ट अग्रता बनाएको छ ।
बुधबार राति वेस्टह्याम युनाइटेडलाई २–० ले पराजित गर्दै लिभरपुलले शीर्षस्थानमा १९ अंकको स्पष्ट अग्रता लिन सफल भएको हो ।
वेस्टह्यामको मैदानमा लिभरपुलको जितमा मोहम्मद सलाह र एलेक्स अक्सलेड चेम्वरलेनले गोल गरे । घरेलु टोलीलाई लगातार दवावमा राखेपनि गोलको लागि ३५औं मिनेटमा पेनाल्टीको साहरा लिनु परेको थियो ।
यससँगै लिभरपुलले प्रिमियर लिगमा १४ खेल बाँकी रहँदा उपाधि यात्रालाई थप बलियो बनाएको छ ।
लिभरपुलले २४ खेलबाट ७० अंक जोडेको छ । जसमा लिभरपुलले २३ जित र १ बराबरी खेलेको छ । समान खेलबाटै दोस्रो स्थानको म्यानचेस्टर सिटीको ५१ तथा तेस्रो स्थानको लेस्टर सिटीको ४८ अंक छ ।
बुधबार राति लिभरपुलसँग पराजित वेस्टह्याम २३ अंकसहित १७औं स्थानमा छ ।
