एजेन्सी । इङ्लिस क्लब टोटेनह्याम युइएफए च्याम्पियन्स लिग फुटबलको प्रिक्वाटफाइनलबाट बाहिरिएको छ ।
मङ्गलबार राति भएको खेलमा साविक उपविजेता टोटेनह्याम आरबी लइपजिगसँग ३–० गोलले पराजित भयो ।
पहिलो लेगमा १–० को जित निकालेको लेइपजिग समग्रमा ४–० ले विजयी भयो ।
घरेलु मैदानमा लेइपजिगलाई जिताउन मार्सेल सवित्जरले दुई तथा इमिल फोर्सवर्गले एक गोल गरे ।
१०औं मिनेटमा मार्सेल सवित्जरले गोल गर्दै घरेलु टोलीको उत्साह जगाए ।
२१औं मिनेटमा सवित्जरले हेड गोल गर्दै टोलीको अग्रता दोब्बर बनाए ।
८७औं मिनेटमा इमिल फोर्सवर्गले गोल गर्दै लेइपजिगको क्वार्टरफाइनल यात्रा निश्चित गरे।
केही राम्रो अवसर पाए पनि टोटेनह्यामले गोल गर्न सकेन ।
