गत सोबार विमानकाे ल्याण्डिङ गियर नखुलेपछि समस्याका बीच जोखिम मोलेर ७३ जनाकाे ज्यान जोगाउन सफल बुद्ध एयरको विमान क्याप्टेन आङगेलु शेर्पाले तत्काल विमान उडाउन नपाउने भएका छन् । गत सोमबार ८ः३० मा काठमाडौंबाट विराटनगरका लागि उडेको बुद्ध एयरको नाइन–एनएनआईको एटिआर विमानको ल्याण्डिङ गियर नखुलेपछि विराटनगरमा अवतरण गर्न नसकी काठमाडौँमा अवतरण गरेको थियो ।
सो प्रकरणमा छानबिन भइरहेकाले क्याप्टेन शेर्पाले तत्काल विमान उडाउन नपाउने नागरिक उड्डयन प्राधिकरणले जनाएको छ । स्रोतका अनुसार उनीमाथि पनि छानबिन भइरहेको छ । विमानमा कुनै समस्या आएमा पाइलटमाथि पनि छानबिन हुने र छानबिनमा परेका पाइलटले विमान उडाउन नमिल्ने भएकाले उनले विमान उडान नपाउने भएका हुन् । उनले छानबिनको अवधिमा पाइलट लाइसेन्स पनि प्रयोग गर्न पाउने छैनन् । अहिलेलाई उनको पाइलट लाइसेन्स स्थगित गरिएको छ ।
७३ जना यात्रु बोकेको सो विमान दुई घण्टाभन्दा बढी आकाशमा उड्नुपरेको थियो । तर, अन्तिममा ल्याण्डिङ गियर खुलेपछि काठमाडौँमा नर्मल अवतरण गरिँदा ठूलो दुर्घटना टरेको थियो । त्यसपछि क्याप्टेन शेर्पाको सबैतिरबाट प्रशंसा भइरहँदा उनीमाथि उडान भर्न रोक लागेकाे हाे।
