बलिउड अभिनेता सुशान्तसिंह राजपूत आत्महत्या प्रकरणमा जोडिएको ड्रग्स (लागूपदार्थ) मामिलासम्बन्धी मुद्दामा पक्राउ परेकी बलिउड अभिनेत्री रिया चक्रवर्तीको जमानतको आग्रहलाई मुम्बईको विशेष अदालतले खारेज गरेको छ ।
अदालतले उनका भाइ शौविक चक्रवर्तीसँगै अन्य आरोपित अब्दुल बासित, जैद विलात्र, दीपेश सावन्त र समुएल मिरन्दाको जमानत अनुरोध पनि खारेज पनि गरेको छ ।
रियाले एनसिबीसँग ड्रग किनेको स्वीकारेकी छन् । आफू र सुशान्तलाई सेवन गर्नका लागि ड्रग किनेको उनको दाबी छ ।
विशेष अदालतले जमानत नदिएपछि रिया चक्रवर्तीका वकिलले सोमबार मुम्बई उच्च अदालतमा जमानतका लागि अनुरोध गर्ने बताएका छन् । उनले विशेष अदालतको आदेशको प्रतिलिपि पाउने बित्तिकै थप कारबाहीको लागि उच्च अदालत जाने बताए ।
सबै व्यक्तिहरुलाई सुशान्तसिंह राजपूतको मृत्युसम्बन्धी लागूपदार्थको मुद्दामा नारकोटिक्स कन्ट्रोल ब्यूरोले पक्राउ गरेको थियो । अदालतले रियालाई १४ दिनका लागि २२ सेप्टेम्बरसम्म न्यायिक हिरासतमा पठाएको थियो।
अदालतले जमानत दिन अस्वीरकार गरेसँगै रिया सोमबारसम्म जेलमै रहने भएकी हुन् । उहिले उनीहरुलाई भायकुला जेलमा राखिएको छ ।
