हिन्दु राष्ट्र स्वाभिमान जागरण अभियानका राष्ट्रिय संयोजक एवं पूर्वप्रधानसेनापति रुक्माङ्गद कटवालले अमेरिका पुगेर नेपाल विश्वभरका हिन्दुहरूको श्रद्धाको केन्द्र भएको बताएका छन् ।
हिन्दु राष्ट्र स्वाभिमान जागरण अभियान घोषणाको केही अन्तरालपछि संयोजक कटवाल अमेरिका गएका हुन् । त्यहाँ उनी केही कार्यक्रमहरूमा सरिक हुने बताइएको छ । उनको संयोजकत्वमा भदौ ३ गते अभियान घोषणा भएको थियो ।
पूर्वसेनापति कटवालले अमेरिकामा रहेका हिन्दुहरूलाई भदौ २८ गते नर्थ क्यारिलिनामा सम्बोधन गरेका थिए । उनले भनेका छन्- “नेपालले सनातनकालदेखि एउटा विशिष्ट हिन्दु जीवन पद्धतिमा आफूलाई स्थापित गर्दै आएको छ । र, त्यो जीवनपद्धति नै नेपालको संस्कृति हो ।”
सामाजिक, सांस्कृतिक एवं आध्यात्मिक आधारमै पनि नेपाल हिन्दु राष्ट्र रहेको उल्लेख गर्दै उनले भने, “लाखौँ मन्दिरहरू, देवालय, शक्तिपीठ, पवित्र कुलपर्वत- हिमालयले सुशोभित राष्ट्रका पावन नदीहरूको कलकल निनादसँगै यहाँका नागरिकहरूले पनि निरन्तर ‘सर्वे भवन्तु सुखिनः’ भनी विश्व कल्याणको विचार प्रवाह गरिरहेका छन् । यो ऋषिभूमि हो, देवभूमि हो । हाम्रा ऋषि महर्षिहरूले वसुधैव कुटुम्बकम् भनी विश्वलाई एउटा परिवारका रूपमा हेर्ने दृष्टिकोण दिए ।”
विश्वमा अनेकौँ इसाई र मुसलमान देश भइरहँदा नेपाललाई विश्वकै १.३ अर्ब हिन्दुले गर्व गर्न सक्ने विश्वको एकमात्र हिन्दुराष्ट्र बनाउन विश्वका हिन्दुहरू एकजुट हुनुपर्ने र त्यसका लागि सबै राष्ट्रले सहयोग गर्नुपर्ने उनको आग्रह थियो ।
हिन्दु स्वयंसेवक अमेरिकाको आयोजनामा भएको कार्यक्रमको संयोजक नेपालको कपिलवस्तु घर भई हाल अमेरिका बसोबास गदै आएका डा. दशरथ लोहारले गरेका थिए ।
