काठमाडौं । नेपाल कम्युनिस्ट पार्टी (नेकपा) का वरिष्ठ नेता माधवकुमार नेपालको सुरक्षामा खटिने ९ जना सुरक्षाकर्मीमा कोरोनाभाइरस (कोभिड–१९) संक्रमण पुष्टि भएको छ ।
नेता नेपालका परिवारका सदस्य र उनको सुरक्षामा खटिएका सशस्त्र प्रहरीको स्वाब परीक्षण गर्दा ९ जना सुरक्षाकर्मीमा कोरोना पोजिटिभ देखिएको हो ।
नेता नेपालका पिएसओ र पछुवा गाडीको चालकसहित उनको सुरक्षामा खटिने सशस्त्र प्रहरीका ९ जनामा शनिबार कोरोना पुष्टि भएको हो ।
नेपालका स्वकीय सचिव मोहन गौतमका अनुसार नेपाल परिवार र उनको सुरक्षामा खटिने सुरक्षाकर्मीको गरी ३३ जनाको शुक्रबार स्वाब संकलन गरिएको थियो ।
कोरोना संक्रमित सबै सुरक्षाकर्मीलाई आइसोलेसनमा राखिएको छ ।
नेपालको परिवारका सबै जान सदस्यहरुको कोरोना रिपोर्ट नेगेटिभ आएको छ ।
यसअघि नेकपा अध्यक्ष पुष्पकमल दाहाल प्रचण्डको सुरक्षामा खटिने ६ जना सुरक्षाकर्मीमा समेत कोरोनाभाइरस संक्रमण देखिएको थियो ।
