काठमाडौं । नेपालमा पछिल्लो २४ घण्टामा थप पाँच जना कोरोना भाइरस संक्रमितको मृत्यु भएको छ ।
शुक्रबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले देशभर पाँच जना संक्रमितको मृत्यु भएको जानकारी दिए ।
मन्त्रालयका अनुसार, एक महिला र चार जना संक्रमित पुरुष गरी पाँच जनाको मृत्यु भएको हो ।
मृत्यु हुनेमा मोरङकी ४० वर्षीया महिला रहेकी छिन् । त्यसैगरी महोत्तरीका ६५ वर्षीय पुरुष, धनुषाका ४५ वर्षीय पुरुष, काठमाडौंका ७० वर्षीय पुरुष र नवलपरासीका ५५ वर्षीय पुरुष को मृत्यु भएको छ ।
योसँगै नेपालमा हालसम्म ३२२ जना कोरोना संक्रमितको मृत्यु भएको छ । संक्रमणको तुलनामा मृत्युदर ०.६२ प्रतिशत रहेको मन्त्रालयले जनाएको छ ।
९२७ जना डिस्चार्ज
यसैबीच, गएको २४ घण्टामा ९२७ संक्रमित डिस्चार्ज भएका छन् । योसँगै डिस्चार्ज हुनेको जम्मा संख्या ३६ हजार ६७२ पुगेको छ । संक्रमणको तुलनामा यो ७१ प्रतिहत हो ।
मन्त्रालयका अनुसारः
देशभर सक्रिय संक्रमितको संख्या १४ हजार ९२५ छ ।
संस्थागत आइसोलेसनमा आठ हजार २९१ जना छन् ।
होम आइसोलेसनमा ६ हजार ६३४ जना छन् ।
देशभरका क्वारेन्टाइनमा ६ हजार ७८ जना छन् ।
आज जम्मा १० हजार ७०१ पिसिआर परीक्षण भएको छ । योसँगै हालसम्म आठ लाख २१ हजार १८६ पिसिआर परीक्षण भएको छ ।
