काठमाडौं । नेपालमा पछिल्लो २४ घण्टामा थप जनामा कोरोना भाइरस संक्रमण पुष्टि भएको छ ।
सोमबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले पछिल्लो २४ घण्टामा देशभरमा थप २४ सय ४० जनामा कोरोना संक्रमण पुष्टि भएको जानकारी दिए ।
मन्त्रालयका अनुसार, आज २३ हजार ५०७ जना सक्रिय संक्रमित छन् ।
पछिल्लो २४ घण्टामा ११ सय ३३ जना निको (डिस्चार्ज) भएका छन् । योसँगै नेपालमा कोरोना संक्रमित निको हुनेको कुल संख्या ६५ हजार २०२ पुगेको छ ।
हाल देशभर क्वारेन्टाइनमा ४ हजार ३३ जना छन् । होम आईसोलेसनमा १२ हजार ३१६ र संस्थागत आईसोलेसनमा ११ हजार १९१ जना छन् ।
यसैगरी आजसम्म आइसियूमा २४४ जना र भेन्टिलेटरमा ४३ जना रहेका छन् ।
पछिल्लो २४ घण्टामा तीन वर्षीय बालकसहित कोरोना संक्रमणबाट थप १९ जनाको मृत्यु भएको छ । योसँगै नेपालमा कोरोनाबाट ज्यान गुमाउनेको संख्या ५५४ पुगेको छ ।
यस्तै आज १३,७८१ पिसिआर भएको छ । योसँगै हालसम्म १० लाख ८८ हजार २२९ पिसिआर परीक्षण भएको छ ।
