भारतले कोरोना भाइरस विरुद्धको खोप निर्यातमा रोक लगाएको छ ।
पछिल्लो समय दोस्रो चरणको संक्रमण सुरु भएकोले भारतमै खोप आवश्यक हुन सक्ने भन्दै अनिश्चितकालीन समयका लागि खोप निर्यातमा रोक लगाएको हो ।
अक्सफर्ड–आस्ट्राजेनेका खोपको सबै निर्यातहरूमाथि रोक लगाइएको भारतीय विदेश मन्त्रालय स्रोतले जानकारी दिएको बीबीसीले जनाएको छ ।
भारतको यो निर्णयले नेपालमा खोप अभियान प्रभावित हुनसक्नेछ । साथै कोभ्याक्स योजनाअन्तर्गत रहेका करिब १९० राष्ट्रलाई असर गर्नसक्ने अनुमान गरिएको छ ।
भारतले अहिलेसम्म ७६ देशमा गरी ६ करोडभन्दा बढी खोप निर्यात गरिसकेको छ । त्यसमध्ये अक्सफर्ड–आस्ट्राजेनेकाकै खोप बढी रहेको छ ।
