३१ डिसेम्बर २०१९ बाट चीनमा फैलिएको कोरोना भाइरस कोभिड–१९ को आतंकले अहिले दक्षिण कोरियामा सन्त्रास फैलाइरहेको छ । कोरियामा जनवरी २० मा पहिलोपटक कोभिड–१९ देखा परेको थियो । चीनको वुहानबाट आएको ३० वर्षीया एक चिनियाँ महिलालाई उक्त भाइरस लागेको प्रमाणित भएको थियो । त्यसयता करिब एक महिनासम्म संक्रमितको संख्या खासै बढेको थिएन ।
तर फेबु्रअरीदेखि निकै रफ्तारमा यसको संक्रमण फैलिरहेको छ भने मृत्यु हुनेको संख्या पनि बढ्दै गएको छ । रोग नियन्त्रण तथा रोकथाम केन्द्र कोरिया (केडिसिडि)को पछिल्लो जानकारीअनुसार हालसम्म मृत्यु हुनेको संख्या २२ पुगेको छ भने ४२ सय २२ जनामा संक्रमण फेला परेको छ । यस हिसाबले संक्रमितको संख्या ४ सय ७६ ले बढेको हो । आइतबार मात्र ८ सय २ जनामा संक्रमण बढेको थियो ।
पछिल्लो जानकारीअनुसार कोरियामा धेरै संक्रमण फैलाउने सहरको रूपमा चिनिएको थेगु सहरमा संक्रमणको संख्या मात्रै आज तीन सय ७७ ले बढेर ३२ सय ९२ पुगेको छ । त्यस्तै, ख्याङ्बोकमा ६७ थपेर ५ सय ८१, राजधानी सउलमा ८१ जना, बुसानमा ८८ जना, ख्यङ्गीदोमा ८४, ख्याङ्नाममा ६२, छुङ्नाममा ७८, उल्सानमा २०, थेजनमा १३, ख्वाङ्जुमा ९, खाङवनदोमा ७, इन्छनमा ६, छेन्बोकमा ५, छेङ्नाममा ३, छेजुदोमा २ जना संक्रमित पुगेको छ ।
अहिलेसम्मको तथ्याङ्कअनुसार सबैभन्दा बढी सिन्चोन्जी चर्चसँग सम्बन्धित संक्रमित रहेको छ । जुन ५९.९ प्रतिशत रहेको छ । त्यस्तै, छेङ्दो देनाम अस्पतालसँग सम्बन्धित ३।४ प्रतिशत, आयातीत तथा त्यससंग सम्बन्धित ०.९ प्रतिशात र अन्य कारणले भएको संक्रमितको संख्या ३५.८ प्रतिशत रहेको छ ।
