एक चिनियाँ व्यापारीले नेपाललाई प्रदान गरेका करिब दुई हजार थान कोरोना टेस्टिङ (परीक्षण) किटसहितका सहायता सामाग्री तिब्बतमा रोकिएका छन् ।
सहयोगस्वरुप व्यापारीले नेपाल पठाउन लागेका सामग्रीको गुणस्तरमा चीन सरकार विश्वस्त हुन नसकेपछि उक्त सहायता सामग्री ल्हासामै रोकिएको स्रोतले जानकारी दियो ।
चीनको स्वास्थ्य विभागले जाँच गर्दा निर्यात गर्ने सूचीमा नरहेको पाएपछि तिब्बतस्थित विदेश विभागको कार्यालयले रोकेको ल्हास्थित नेपाली महावाणिज्य दूतावासले जानकारी दियो ।
विदेश विभागले निर्यात गर्ने लिस्टमा नरहेको भनी जानकारी गराएपछि आफूहरुले ती कार्गो सामग्री जिम्मा नलिएको महावाणिज्य दूतावासका प्रवक्ता जिम्सन रुम्दाली राईले जानकारी दिए ।
चिनियाँ स्वास्थ्य विभागले ती सामग्रीको गुणस्तर मापन गर्दा निर्यातयोग्य नदेखिएको भनेपछि उक्त सहायता सामग्री तिब्बतमै रोकिएका हुन् ।
बेइजिङबाट पठाइएका सामान ल्हासासम्म आइपुग्न चार दिन लागेको थियो ।
