काठमाडौँ । कोरोना संक्रमितको संख्या विश्वभर साढे १९ लाखनजिक पुगेको छ ।

सबैभन्दा धेरै स‌ंक्रमण अमेरिकामा फैलिएको छ । यो सामग्री तयार पार्दासम्म विश्वभर १९ लाख २९ हजारमा कोरोना संक्रमित प्रमाणित भइसकेका छन् । त्यसमध्ये अमेरिकामामात्रै ५ लाख ८७ हजार १७३ जना छन् । यो कुल संक्रमणको ३० प्रतिशत हुन आउँछ । अमेरिकामा २३ हजार ६४४ जनाको ज्यान गइसकेको छ ।

त्यसपछि स्पेनमा १ लाख ७० हजार ९९ जना संक्रमित छन् । त्यहाँ १७ हजार ७५६ जनाको मृत्यु भइसकेको छ । त्यसपछि इटालीमा १ लाख ५९ हजार ५१६ जनामा संक्रमित पुष्टि भइसकेको छ । इटालीमा अमेरिकापछि दोस्रो बढी मृत्यु भएको छ । त्यहाँ कोरोना भाइरसले २० हजार ४६५ जनाको ज्यान लिएको छ ।

फ्रान्समा १ लाख ३६ हजार ७७९ जना संक्रमित छन् भने जर्मनीमा १ लाख ३० हजार ७२ जनाको पुष्टि भइसकेको छ । जर्मनीमा ३ हजार १९४ जनाले ज्यान गुमाउँदा फ्रान्सले भने संक्रमणको तुलनामा धेरै क्षति भोग्नु परेको छ । फ्रान्समा अहिलेसम्म १४ हजार ९६७ जनाको ज्यान गइसकेको छ ।

उता बेलायतमा पनि मृत्युको संख्या बढेको छ । ८८ हजार ६२१ जनामा संक्रमण देखिइसकेको बेलायतमा ११ हजार ३२९ जनाले ज्यान गुमाइसकेका छन् ।

हेर्नुस् सबै देशको विवरण