स्पेन सरकारले कोरोना भाइरसको सङ्क्रमण रोकथामका लागि लगाइएको लकडाउन चरणबद्ध रूपमा हटाउँदै जाने जनाएको छ । यसका लागि स्पेन सरकारले चार चरणको एउटा योजना बनाएको छ । स्पेन सरकारका अनुसार आउँदो जुन महिनाको अन्तिमसम्ममा लकडाउन हट्ने सम्भावना छ ।
सबैभन्दा पहिला मे महिनाको ४ तारिखमा लकडाउन हटाइनेछ र त्यसपछि बिस्तारै अरू क्षेत्रमा पनि लकडाउन हटाइनेछ ।
स्पेनमा कोरोना सङ्क्रमणको कारण अहिलेसम्म २४ हजारभन्दा धेरैको ज्यान गएको छ भने दुई लाख ३२ हजारभन्दा धेरैमा सङ्क्रमण पुष्टि भएको छ । स्पेन कोरोनाको कारण प्रभावित भएको देशमध्ये एक हो ।
कोरोनाको कारण अहिलेसम्म विश्वभर ३१ लाख ३८ हजारभन्दा बढीमा सङ्क्रमण पुष्टि भएको छ । सङ्क्रमितमध्ये ९ लाख ५५ हजारभन्दा बढी उपचारपछि निको भएका छन् । त्यस्तै, दुई लाख १७ हजारभन्दा धेरैको ज्यान गएको छ ।
सङ्क्रमितमध्ये १९ लाख ६४ हजारभन्दा बढीको उपचार भइरहेकोमा ५६ हजारभन्दा बढीको अवस्था गम्भीर छ भने बाँकी १९ लाखभन्दा बढीको अवस्था सामान्य छ ।
