पश्चिम बंगालमा १० घण्टाभित्र सय करोड भारतीय रुपैयाँ भन्दा बढीको रक्सी बिक्री भएको छ । यो नयाँ रेकर्ड हो ।
लकडाउन अघि यस राज्यमा साधारणतया दैनिक औसतमा ४० देखि ४५ करोड भारुको रक्सी बिक्री हुन्थ्यो । मंगलबार मात्रै ६५ करोड बढीको रक्सी बिक्री भएको बताइएको छ ।
रक्सी पसलमा मानिसहरुको निकै भीड लागेको छ ।
कोरोनासँग जुध्नका लागि पैसा जुटाउनका लागि राज्य सरकारले रक्सीमा ३० प्रतिशत अतिरिक्त बिक्री कर लगाएको छ ।
पश्चिम बंगाल सरकारले दुई दिनमा रक्सीको बिक्रीबाट राजस्वमा बम्पर वृद्धि भएको जानकारी दिएको छ ।
आयकर विभागका एक अधिकारीले भने, ‘रक्सीको बिक्रिमार्फत् सरकारलाई ६० करोडको राजस्व प्राप्त भएको छ ।’
मानिसहरु निकै लामो समय पैदल हिँडेर रक्सी खरिद गर्न पुगेका छन् । केही स्थानमा भीड नियन्त्रण गर्नका लागि प्रहरीले लाठीचार्ज समेत गरेको थियो।
सरकारले प्रति व्यक्तिलाई दुई बोतल रक्सी बेच्ने निर्देशन दिएको छ । कुनै स्थानमा त परिवारका सबै सदस्य नै लाइनमा बसेका थिए ।
यसैबीच, रक्सीको पसलमा भीड कम गर्नका लागि थोक विक्रेता सरकारी वेस्ट बंगाल बेवरेज कर्पोरेशनले ई–रिटेल र होम डेलिभरीका लागि एउटा नयाँ पोर्टल बनाएका छन् ।
