अमेरिकामा आउँदो नोभेम्बरमा हुने राष्ट्रपति चुनावमा डेमोक्र्याटिक पार्टीका उम्मेदवार बाइडेनको समर्थनमा पूर्वराष्ट्रपति बाराक ओबामा पछिल्लो केही महिनादेखि खुलेर लागि परेका छन् ।

पार्टीभित्रबाट उम्मेदवार चयन प्रक्रियाभर सार्वजनिक रुपमा केही नबोलेका ओबामाले उम्मेदवारीको होडमा बाइडेन मात्रै बाँकी रहेपछि अप्रिलमा बाइडेनलाई समर्थन गर्ने घोषणा गरे ।

त्यसयता, ओबामाले लगातार बाइडेनको पक्षमा चुनावी अभियान गरिरहेका छन् । ओबामाले राष्ट्रपति डोनाल्ड ट्रम्पको खुलेर आलोचना गर्दै अमेरिकालाई सही मार्गका ल्याउनका लागि आउँदो चुनावमा बाइडेनलाई जिताउनुको विकल्प नरहेको बताउने गरेका छन् ।

बाइडेनले आफूलाई ओबामा–बाइडेन शासनकालको ‘उत्तराधिकारी’ का रुपमा बारम्बार प्रस्तुत गर्ने गरेका छन् । सन् २००८ देखि २०१६ सम्म ओबामा राष्ट्रपति रहँदा बाइडेन उपराष्ट्रपति थिए ।

ओबामाले बाइडेनलाई ‘इन्डोर्स’ गरे पनि सँगै कुनै पनि कार्यक्रममा सहभागी भएका थिएनन् । तर, मंगलबार सो कमी पनि पूरा भएको छ । बाइडेनको चुनावी अभियानका लागि सहयोग जुटाउनका लागि भएको ‘भर्च्युअल फण्ड रेजर’ मा ओबामा र बाइडेन मंगलबार संयुक्त रुपमा सहभागी भए ।

सो अभियानबाट बाइडेनको अभियानका लागि एक लाख ७५ हजार मानिसबाट ७६ लाख अमेरिकी डलर संकलन भएको छ । यस्तै, ठूला दाताहरुबाट थप ३४ लाख अमेरिकी डलर संकलन भएको बाइडेनको चुनावी अभियानलाई उद्धृत गर्दै द वासिङ्गटन पोस्टले जनाएको छ ।

सहयोग संकलनका लागि भएको कार्यक्रमलाई सम्बोधन गर्दै ओबामाले भने, ‘तपाईँहरु सबैले सोही अत्यावश्यकता महसुस गर्नुभएको छ जुन मैले गरिरहेको छु । म यहाँ यो भन्नका लागि आएको छु कि सहयोग आउने क्रममा छ ।’ उनले यसो भनेर डोनाल्ड ट्रम्पको विकल्पको कुरा गरेका हुन् ।

ट्रम्पको नाम उल्लेख नगरी ओबामाले आक्रामक आलोचना गर्दै भने, ‘पछिल्लो केही वर्षमा ह्वाइट हाउसले तथ्य तथा विज्ञानको कुनै अर्थ नरहेको भन्नेतर्फ आफूलाई बढाएको देखिरहेका छौँ । त्यसले हजारौँको ज्यान लिएको रोगलाई फेक न्युज बनाइदिएको छ ।

न्याय विभाग राष्ट्रपतिको मात्रै ख्याल गर्ने हतियार सुसज्जितहरुको समूह मात्रै बनेको छ । त्यसले लगातार विभाजनलाई बढावा दिएको छ । र देशका केही मानिसलाई अरुभन्दा वास्तविक अमेरिकी ठानिएको छ ।’

ओबामाले यसो भनेर कोरोना भाइरसविरुद्ध ट्रम्प प्रशासनको कमजोर प्रदर्शन, रंगभेद तथा बिथोलिएको न्याय व्यवस्थामाथि आक्रोश पोखे ।ओबामाले सबैलाई अहिले गरिरहेभन्दा प्रयास अधिक गर्न र चुनावलाई गम्भीर रुपमा लिन आग्रह गरे ।

उनले जो बाइडेनको प्रशंसा गर्दै उनको जीवनले सामान्य अमेरिकी जीवनलाई बुझ्न आफूलाई सहयोग गरेको र उनले सामान्य अमेरिकीका समस्यालाई आफ्नो गरी बुझ्ने बताए ।