कोरोना भाइरस (कोभिड–१९) संक्रमणको सुरुवातदेखि बन्द रहेका चीनका सिनेमाघर (फिल्म हल) अब खुल्ने भएका छन् ।
कोरोना संक्रमणका कारण त्यहाँ करिब ६ महिनादेखि सिनेमाघर लगायत मनोरञ्जनका सार्वजनिक स्थल बन्द थिए । अन्य स्थानहरु खुले पनि सिनेमाघर भने खुलेका थिएनन् ।
यही जुलाई २० तारिखदेखि त्यहाँ सिनेमाघर खुल्ने चिनियाँ सञ्चारमाध्यमले जनाएका छन् ।
गएको डिसेम्बर अन्तिम साता चीनको वुहानबाट सुरु भएको कोरोना भाइरस महामारीको रुपमा विश्वभर फैलिसकेको छ ।
थुप्रै देश अहिले पनि कोरोनाको तीव्र संक्रमण र मृत्युसँग जुधिरहेका छन् ।
तर चीनले भने यसलाई लगभग नियन्त्रण गरिसकेको छ ।
त्यहाँको जनजीवन सामान्य भइसकेको छ भने अर्थतन्त्र चलायमान हुने क्रममा छ ।
