भारतको बनारसमा केही दिनअघि जवरजस्ती कपाल मुण्डन गरिएका व्यक्ति नेपाली नभएको भारतीय प्रहरीले जनाएकाे छ ।
उनलाई स्थानीय हिन्दु सेनाका सदस्यले एक हजार भारतीय रुपैयाँ दिएर 'नेपाली' बनाएको रहस्य खुलेको हो । उत्तर प्रदेशको बनारसमा नेपाली नागरिकको जवरजस्ती कपाल मुन्डन गरेको घटनाले शनिबार नयाँ मोड लिएको हो । वाराणसीका एसएसपी अमित पाठकका अनुसार भिडियोमा कपाल मुन्डन भइरहेको देखिएका कथित नेपाली व्यक्ति शुद्ध रूपमा भारतीय नागरिक हुन् । पुलिसको टोलीले उनलाई हिरासतमा लिएर सोधपुछ गर्ने क्रममा उक्त खुलासा भएको हो । कथित नेपाली युवकले आफ्नो नाम धर्मेन्द्र सिंह बताएका छन् । उनी साडी दोकानका कामदार भएको खुलेको छ ।
लकडाउनका कारण आर्थिक समस्यामा परेका उनलाई हिन्दु सेनाका सदस्यहरूले एक हजार रुपैयाँको प्रलोभनमा पारेर भिडियो बनाएका थिए । पोल खुलेपछि अहिले पुलिसले विश्व हिन्दू सेनाका संस्थापक र मुख्य आरोपी अरुण पाठकको खोजीलाई तीव्र बनाएको छ । अहिलेसम्म सन्तोष पाण्डेय, राजु यादव, अमित दुबे र आशीष मिश्रा गरी ४ जना पक्राउ परेका छन् ।
