६० वर्षदेखि निरन्तर प्रदान गर्दै आएको नोबेल पुरस्कारको वार्षिक समारोह यस वर्ष कोरोना महामारीका कारण रद्द गरिएको छ । ६० वर्षपछि पहिलोपटक नोबेल पुरस्कार समारोह नगर्ने निर्णय गरिएको हो ।

यस वर्ष नोबेल विजेताको घोषणा गरिने भए पनि १० डिसेम्बरमा हुने समारोह नगर्ने निर्णय नोबेल फाउण्डेसनले गरेको हो । यसअघि सन् १९५६ मा सोभियत संघले हंगेरीमा आक्रमण गर्दा नोबेल पुरस्कार समारोह आयोजना रद्द गरिएको थियो ।

शान्ति, साहित्य, भौतिक, रसायन, चिकित्सा विज्ञान र अर्थशास्त्रको क्षेत्रमा विश्वकै ठूलो मानिने पुरस्कार हो, नोबेल पुरस्कार । सन् १९०१ देखि यो पुरस्कार दिन सुरु गरिएको हो ।  

अर्थशास्त्रको क्षेत्रमा नोबेल पुरस्कार दिन थालिएको भने १९६८ देखि हो । नोबेल शान्ति पुरस्कार नर्वेको राजधानी ओस्लोमा दिइन्छ भने अन्य विधाका भने स्विडेनको राजधानी स्टकहोममा दिइन्छ । अहिलेसम्म झन्डै आठ सय व्यक्तिले नोबेल पुरस्कार पाइसकेका छन् ।