उत्तर कोरियाली अधिकारीहरुले चीन हुँदै आफ्नो देश प्रवेश गर्नेलाई गोली हान्नेसम्मको आदेश जारी गरेका छन् ।
कोरोना भाइरस संक्रमण नियन्त्रणका लागि उत्तर कोरियाली अधिकारीहरुले यस्तो कडा कदम उठाएको हुन् ।
चीन उत्तर कोरियाको सबैभन्दा ठूलो सहयोगी मुलुक हो । तर, चीन हुँदै आफ्नो देश आउनेलाई गोली हान्नेसम्मको आदेश उत्तर कोरियाली अधिकारीले जारी गरेको छन् ।
उत्तर कोरियाली सीमामा स्पेशल अपरेशन फोर्स तैनाथ गरिएको छ । स्ट्राइक फोर्सलाई गोली हान्नेसम्मको आदेश दिइएको छ । खबर अनुसार सीमा क्षेत्रमा एक किलोमिटर भित्र प्रवेश गर्ने जोसुकैलाई पनि उनीहरुले केही नसोधी गोली हान्न सक्नेछन् ।
उत्तर कोरियामा अहिलेसम्म कोरोना भाइरस संक्रमणको एउटा पनि घटना रेकर्डमा छैन । प्योङयाङले महामारी रोक्नका लागि गत जनवरीमै चीनसँगको सीमा क्षेत्र बन्द गरेको थियो ।
गत जुलाईमा सुरक्षा व्यवस्था कडा बनाउँदै उसले संकटकाल लगाएको थियो । सीमा बन्द गर्दा कालोबजारी मौलाएपछि अधिकारीहरु यस्तो कडा कदम उठाउन लागेका हुन् ।
