टोकियो । जापानमा पछिल्लो २४ घण्टामा कोरोना भाइरस संक्रमितको सङ्ख्या ४८० रहेको र थप चार संक्रमितको मृत्यु भएको सरकारद्वारा सार्वजनिक तथ्याङ्कमा उल्लेख छ । यो तथ्याङ्कसँग जापानमा कूल संक्रमितको सङ्ख्या ७९ हजार २६० पुगेको छ भने पानी जहाजमा मृत्यु भएका १४ सहित एक हजार ५२० जनाको मृत्यु भएको छ ।
पहिलो चरणको संक्रमणलाई करिब नियन्त्रण गर्न सफल जापानमा दोस्रो लहरमा संक्रमितको सङ्ख्या दैनिक बढ्न थालेपछि जापानले नियन्त्रणका लागि सामाजिक दूरी कायम लगायतका कडा उपायहरूलाई अवलम्बन गर्दै आएकोमा शनिबारदेखि यसलाई केही खुकुलो पारेको छ ।
यो वर्षको सुरुमा टोकियोको नजिकको योकोहामामा ‘क्वारेन्टाइन’ मा राखिएको डायमण्ड प्रिन्सेस नामक यात्रुबाहक पानीजहाजमा भेटिएका ७१२ संक्रमितहरूको सङ्ख्या नै एकै स्थानमा भेटिएका धेरै संक्रमितको सङ्ख्या हो । यद्यपि यसलाई जापानले तथ्याङ्कमा समावेश गर्ने गरेको छैन ।
स्वास्थ्य मन्त्रालयका अनुसार संक्रमितमध्ये १५९ जनामा गम्भीर समस्या रहेको र उनीहरूलाई भेन्टिलेटरको सहायतामा उपचार भइरहेको छ । संक्रमणको हिसाबले मुख्य केन्द्र मानिएको राजधानी टोकियोमा आइतबार मात्रै १६२ नयाँ सङ्क्रमित व्यक्ति भेटिएका छन् । टोकियोमा मात्रै सङ्क्रमित हुनेको सङ्ख्या २४ हजार २०८ पुगेको छ ।
