बेलायतमा दोस्रो पटक देशव्यापी रुपमा लकडाउन घोषणा गरिएको छ । कोरोना संक्रमणको दोस्रो लहर फैलिएपछि आगामी बिहीबारदेखि लागू हुने सो लकडाउन घोषणा गरिएको हो ।
बेलायतमा यसअघि मार्च २३ देखि पहिलो पटक लकडाउन गरी जुलाईमा खुला गरिएको थियो ।
प्रधानमन्त्री बोरिस जोन्सनले यो पटकको लकडाउन पहिलेजस्तो स्कुल, कलेज तथा विश्वविद्यालयहरू भने बन्द नहुने बताएका छन् । उनले अत्यावश्यक वस्तुबाहेकका अन्य पसल पूर्णरूपमा बन्द रहने बताएका छन् ।
त्यसैगरी उनले यो लकडाउन अविधमा हस्पिटालिटी क्षेत्रमा रेस्टुरेन्ट र पबहरू बन्द रहने बताए । ‘टेक–वे पसलहरू भने खुल्नेछन्,’ पत्रकार सम्मेलनमा उनले भनेका छन् । लकडाउन आगामी डिसेम्बर २ तारिखसम्म कायम रहने उनले जानकारी दिए ।
