राष्ट्रपतिमा निर्वाचित जो बाइडेनको जितलाई रिपब्लिकन सिनेटरहरु आधिकारिकता प्रदान गर्नबाट अन्तिम प्रयासमा लागेका छन् । नोभेम्बर ३ मा भएको चुनावमा धाँधली भएको र आफूबाट नतिजा खोसिएको आरोप लगाउँदै आएका राष्ट्रपति डोनाल्ड ट्रम्पले अझै हार अस्वीकार गरिरहेका छन् ।
उनकै प्रमाण बिहीन आरोपको पछि लागेर जिम्मेवारीमा रहेका तथा नवनिर्वाचित केही रिपब्लिकन सिनेटरहरुले इलेक्टोरल कलेज मत सदनबाट हुने प्रमाणिकरणमा नमान्ने बताएका हुन् ।
उनीहरुले सदनबाट हुने प्रमाणिकरणका लागि १० दिन ढिलाइ गरिनुपर्ने बताएका छन् । जनवरी ६ मा सदनले बाइडेनको जितलाई प्रमाणीकरण गर्ने तालिका छ ।
हार स्वीकार गर्न अस्वीकार गर्दै आएका राष्ट्रपति ट्रम्पको चुनावको नतिजा आफ्नो पक्षमा उल्ट्याउने कानूनी प्रयास प्रमाणको अभावमा अदालतहरुले खारेज गरेका छन् । त्यसपछि उनले इलेक्टोरल कलेज मतदातालाई प्रभावित गर्ने प्रयास गरे । त्यसमा पनि सफल नभएपछि नतिजा उल्ट्याउनका लागि सिनेटको अन्तिम विकल्प अपनाउने प्रयास गरेका हुन् ।
बाइडेनले गएको नोभेम्बर ३ मा भएको चुनावमा ३०६ इलेक्टोरल कलेज मत पाएर जित हासिल गरेका हुन् । ट्रम्पले मात्रै २३२ इलेक्टोरल कलेज मत पाए । इलेक्टोरल कलेज मतलाई जनवरी ६ मा सदनले प्रमाणिकरण गर्नु पर्छ ।
बाइडेन र उपराष्ट्रपतिमा निर्वाचित कमला ह्यारिसले जनवरी २० मा शपथ लिँदै छन् ।
