अमेरिकाका पूर्व राष्ट्रपति डोनाल्ड ट्रम्पले राष्ट्रपतिको कार्यालयमा आफ्ना उत्तराधिकारी जो बाइडेनका लागि पत्र छोड्ने परम्परालाई निरन्तरता दिएका छन् ।
यद्यपि, उनले यो पत्रमा के लेखेका छन्, त्यसबारे केही थाहा छैन तर राष्ट्रपति जो बाइडेनले उक्त सन्देशलाई निकै उदार बताएका छन् । बाइडेनको भनाइ उद्धृत गर्दै सीएनएनले लेखेको छ, ‘यो निकै निजी थियो त्यसैले उनीसँग कुरा नगरिकन म यसबारे केही भन्ने छैन । ’
यो पत्रमा ट्रम्पले बाइडेनका लागि के लेखेका छन् ? यो प्रश्नको जवाफमा प्रेस सेक्रेटरी जेन पास्कीले भनिन्, ‘उहाँले उक्त पत्र खोलेर हेर्ने बेला म उहाँसँगै अफिसमा थिएँ । उहाँले यसलाई उदार र अनुकूल बताउनुभएको छ ।’
‘उहाँले यो निजी पत्रमा के लेखिएको छ भनेर सार्वजनिक नगर्ने बताउनुभएको छ । हाल ट्रम्प र बाइडेनबीच कुराकानीको कुनै योजना छैन ।’
साकीले भनिन्, ‘म यसलाई पूर्व राष्ट्रपतिबीच लामो टेलिफोन वार्ताको संकेतको रुपमा पनि हेर्दिनँ ।’
