म्यानमार । म्यानमारको राजधानी याङ्गुनका शहरबासिन्दाले भाँडा तथा गाडीका हर्न बजाएर सैन्य ‘कू’ को विरोध गरेका छन् ।
म्यानमारमा भएको सैन्य ‘कू’ को विरोधको क्रम आन्तरिक तथा अन्तर्राष्ट्रिय रुपमा तीव्र हुँदै गएको छ । सोमबार बिहान सेनाले गरेको ‘कू’ को विरोधमा विश्व समुदाय एक भइरहँदा म्यानमारका बासिन्दा पनि विरोधमा उत्रिएका हुन् ।
सोमबार सेनाले निर्वाचित सरकारका राष्ट्रपति, नेतृ आङ साङ सुकीसहितलाई गिरफ्तार गरि सत्ता आफ्नो नियन्त्रणमा लिएको थियो । सेनाले एक वर्षका लागि देशमा संकटकालको घोषणा पनि गरेको छ ।
प्रजातन्त्रमाथि भएको आक्रमणको विरोधमा स्वास्थ्यकर्मीहरुले देशका प्रमुख शहरहरुमा हडतालको योजना बनाएको अन्तर्राष्ट्रिय सञ्चारमाध्यमले जनाएका छन् ।
यस्तै अभियन्ताहरुले सत्ताप्रति नागरिक बहिष्कारका लागि आह्वान गरेका छन् । तर सुरक्षा व्यवस्था अति नै कडा भएकाले अवस्था सेनाको पूर्ण नियन्त्रणमा रहेको पत्रकारहरुले बताएको बिबिसी तथा रोयटर्सले उल्लेख गरेका छन् ।
