नयाँदिल्ली । भारतको मध्य प्रदेशमा मंगलबार एउटा बस नहरमा खस्दा ३७ जना यात्रुको मृत्यु भएको भारतीय अधिकारीहरूले बताएका छन् । प्रहरीले स्थानीयको सहयोगमा घटनास्थलमा अन्य घाइतेहरुलाई उद्धार गरेको एक अधिकारीले जानकारी दिए ।
मंगलबार बिहान ५० जनाभन्दा बढी यात्रुसहितको बस सटना गाउँ नजिक नजिकैको नहरमा डुबेको बताइएको छ । भारतको सडकको विशाल सञ्जाल कमजोर तथा खराब रहेको कारण वर्षेनी हजारौँ भारतीयको सडक दुर्घटनाका कारण मृत्यु हुने गर्छ ।
स्थानीय सञ्चारमाध्यमका अनुसार बस पूर्णरूपमा डुबेको र सामजिक सञ्जालमा आएका तस्वीरहरूमा उद्धारकर्ताहरूले लाइफ ज्याकेट लगाएर निरन्तर उद्धार गरिरहेको देखाइएको छ । प्राप्त विवरणअनुसार दुर्घटनापछि चालकसहित सात व्यक्ति पौडी खेली पानीबाट सुरक्षित स्थलमा जान सफल भएका बताइएको छ ।
प्रहरी अधिकृत धर्मवीर सिंहले घटनालाई पुष्टि गर्दै भने, ‘हामीले अहिलेसम्म ३७ जनाको मृत शरीर पानीबाट निकालेका छौँ, तिनीहरुलाई अन्तिम परीक्षणका लागि पठाइएको छ, वेपत्ता अन्य यात्रुहरूको खोजी तथा उद्धारका लागि स्थानीयको सहयोगमा प्रहरी तथा उद्धार टोलीहरू खटिरहेका छन् ।’
घटनापछि नहरको पानी बन्द गरी बसलाई दुर्घटना भएको तीन घण्टापछि क्रेनको सहयोगमा पानी बाहिर निकालिएको छ । यसैबीच भारतीय प्रधानमन्त्री नरेन्द्र मोदीले दुर्घटनामा मृत्यु भएका परिवारका सदस्यलाई क्षतिपूर्ती तथा राहत स्वरुप दुई लाख भारतीय रुपैयाँ सहयोग प्रदान गर्ने ट्वीटरमा बताएका छन् ।
भारतमा कमजोर सडक संरचना, चालकको लापरबाही, पूराना गाडीलगायतका कारण सन् २०१९ मा एक लाख ५१ हजार ११३ जनाको मृत्यु भएको सरकारी तथ्यांक छ ।
