राष्ट्रिय प्रजातन्त्र पार्टी संयुक्तले पेट्रोलियम पदार्थमा थपिएको कर तत्काल फिर्ता गर्न सरकारसँग माग गरेको छ ।
राप्रपा संयुक्तका अध्यक्षद्वय पशुपति सम्सेर राणा र डा. प्रकाशचन्द्र लोहनीले संयुक्त विज्ञप्ति जारी गरी सो कर खारेजीको माग गरेका हुन् ।
राप्रपा संयुक्तले जुनसुकै कारणले भए पनि कर उठाउने निर्णय जनताबाट अनुमोदित हुनु पर्ने जनाएको छ । संसद् चलेको बेला सरकारले कर फेरबदल गर्नु प्रजातान्त्रिक मान्यताविपरीत भएको आरोप उसले लगाएको छ ।
सरकाले पूर्वाधार विकासको लागि भन्दै इन्धनमा थप कर लगाउने निर्णय गरेको थियो ।
अध्यक्षद्वय राणा र लोहनीले यसअघि लगाइएको करबाट सङ्कलित ४१ अर्ब रुपैयाँ खर्च गर्न नसकिरहेको बेला कर थप्ने निर्णय गैरजिम्मेवार भनेका छन् । उनीहरूले जनतालाई कर थोपर्नु निन्दनीय भएको उल्लेख गरेका छन् ।
