प्रधानमन्त्री एवं नेकपा अध्यक्ष केपी शर्मा ओली मिर्गौला प्रत्यारोपणका लागि सोमबार अस्पताल भर्ना हुने भएका छन् ।
उनी दोस्राे पटक मिर्गौला प्रत्यारोपणका लागि त्रिवि शिक्षण अस्तपाल, महाराजगञ्जमा भर्ना हुन लागेका हुन् । यससँगै उनले दोस्राे पटक कहाँ मिर्गाैला प्रत्यारोपण गर्छन् भन्ने अनुमानको पनि टुगाे लागेको छ ।
नेकपा महासचिव विष्णु पौडेलले सामाजिक सजालमार्फत यसको पुष्टि गरेका छन् । उनले प्रधानमन्त्रीको स्वास्थ्यलाभको कामनासमेत गरेका छन् ।
सत्तासीन नेकपाभित्र राष्ट्रियसभा सदस्यमा उपाध्यक्ष वामदेव गौतमलाई राष्ट्रपतिबाट मनोनयन गराउने पार्टी सचिवालयको निर्णय अस्वीकार गरेपछि विवादमा तानिएको अवस्थामा प्रधानमन्त्रीले सबैलाई आश्चर्यमा पार्दै अचानक पुन मिर्गौला प्रत्यारोपणमा गर्ने निर्णय गरेका छन् । गाैतमका विषयमा आइतबार बसेको नेकपा सचिवालयको बैठकले थप कुनै निर्णय भने गरेन ।
प्रधानमन्त्री ओलीले १३ वर्षअघि पहिलोपटक भारतमा मिर्गौला प्रत्यारोपण गरेका थिए । यसपटक भने त्रिभुवन विश्वविद्यालय शिक्षण अस्पतालमा प्रत्यारोपण गराउने भएका हुन् ।
