काठमाडौं। भारतीय रक्षामन्त्री राजनाथ सिंहले नेपाली भूमि हुँदै लिपुलेक जोड्ने सडककाे उद्घाटन गरेपछि परराष्ट्र मन्त्रालयले विज्ञप्ति निकालेर खेद प्रकट गरेकाे छ । परराष्ट्र मन्त्रालयले आज विज्ञप्ति निकाल्दै भारतीय रक्षामन्त्री राजनाथ सिंहले २६ वैशाखमा धार्चुला-लिपपुलेक सडकको उद्घाटन गरेको घटनाप्रति नेपालले खेद व्यक्त गरेको हाे ।
नेपाल सरकारले सुगौली सन्धिअनुसार काली नदीदेखि पूर्वको लिम्पियाधुरा, लिपुलेक र कालापानीसहितको सबै भाग नेपालको हो भन्नेमा निरन्तर अडान राख्दै आएको विज्ञप्तिमा उल्लेख छ-‘नेपालले धेरै पहिलेदेखि यो अडान राख्दै आएको छ । केही अघि भारतले राजनीतिक नक्शा जारी गरेपछिको अवस्थामा २० नोभेम्वर २०१९ मा पठाएको डिप्लोम्याटिक नोटमा त्यसलाई दोहोर्याएको छ ।’
नेपाल सरकार ऐतिहासिक सन्धि, दस्तावेज र नक्शामा आधारित भएर कूटनीतिक रूपमा सीमा विवादको समाधान खोज्न प्रतिवद्ध रहेको विज्ञप्तिमा बताइएकाे छ । साथै भारतकाे एकतर्फी अतिक्रमित कदमले दुई देशबीच प्रधानमन्त्रीस्तरमा भएको ‘सीमा विवाद छलफलद्वारा टुंगो लगाउने’ समझदारीको पनि उल्लंघन हुने ठहर गरेको छ ।
