काठमाडौं । नेपाल कम्युनिष्ट पार्टी (नेकपा) का प्रवक्ता नारायणकाजी श्रेष्ठले हालैको अमेरिकी नीतिले मानव अधिकार र लोकतन्त्रको खिल्ली उडाएको टिप्पणी गरेका छन् ।
कम्युनिस्ट पार्टीका सदस्यलाई नागरिकता वा स्थायी आवासीय प्रमाणपत्र नदिने गरी हालैको अमेरिकी नीतिप्रति श्रेष्ठले यस्तो टिप्पणी गरेका हुन् ।
अमेरिकी नीतिले कुनै पार्टीको सदस्य बन्न पाउने व्यक्तिको अधिकार र लोकतन्त्रको खिल्ली उडाएको उले बताएका छन् ।
मंगलबार सामाजिक सञ्जाल ट्विटरमा श्रेष्ठले लेखेका छन्, 'यसले (अमेरिकी नीतिले) स्वेच्छाले कुनै पार्टीको सदस्य बन्न पाउने अधिकार र लोकतन्त्रको खिल्ली उडाएको छ । यही हो ‘नमुना पुँजीवादी लोकतन्त्र !'
अमेरिकाले हालै देशभित्र वा बिदेशको कुनै कम्युनिष्ट पार्टीको सदस्यता लिएको आप्रवासीलाई नागरिकता वा स्थायी आवासीय प्रमाणपत्र नदिने नीतिको खुला घोषणा गरेको छ। यसले स्वेच्छाले कुनै पार्टीको सदस्य बन्न पाउने अधिकार र लोकतन्त्रको खिल्लि उँडाएको छ।यही हो 'नमुना पुँजीवादी लोकतन्त्र' !
— NKShresthaPrakash (@nksthaprakash) October 6, 2020
अमेरिकाले हालै आफ्नो आप्रवासी नियम परिवर्तन गरेको छ । नयाँ नियमअनुसार, अब कम्युनिष्ट पार्टीका सदस्य वा सो सरहको पदमा रहेकाहरुले अमेरिकाको स्थायी बसोवासको अनुमति वा नागरिकता नपाउने व्यवस्था छ ।
गत शुक्रबार अमेरिकाको यूएस सिटिजन एण्ड इमिग्रेसन सर्भिस (युएससिआइएस) ले जारी गरेको घोषणा अनुसार अमेरिकाको राष्ट्रिय सुरक्षाको जोखिमलाई ध्यानमा राख्दै यस्तो व्यवस्था गरिएको हो ।
युएससिआइएसले सार्वजनिक गरेको विज्ञप्तिमा कुनै पनि कम्युनिष्ट पार्टीका वा निरंकुश पार्टीसँग आवद्ध भएका मानिसले अमेरिकामा आप्रवासीको रुपमा आवेदन दिन नसक्ने उल्लेख छ ।
प्रतिक्रिया
श्रेष्ठको उक्त ट्विटमा विभिन्न प्रतिक्रिया आएका छन् । अधिकांशले उनलाई 'आफ्नै देशको गणतन्त्रप्रति गम्भीर नभएर अमेरिकी लोकतन्त्रको यति धेरै चिन्ता लिइराख्न जरुरी नभएको' बताएका छन् ।
'देशमा भ्रष्टाचार र लुटतन्त्र मौलाएको, गोविन्द केसीको जायज मागहरुलाई बेवास्ता गरिएको' भन्दै मुलुकको वास्तविक समृद्धितर्फ केन्द्रित हुन श्रेष्ठलाई ट्विटर प्रयोगकर्ताहरुले आग्रह गरेका छन् ।
