सरकारले बढुवासँगै प्रहरी अतिरिक्त महानिरीक्षक (एआइजी) विश्वराज पोखरेलको पदस्थापन गरेको छ ।
बिहीबार बसेको मन्त्रिपरिषद बैठकले पोखरेललाई अपराध अनुसन्धान विभागमा सरुवा गरेको हो ।
मन्त्रिपरिषदले पोखरेल कार्यरत महानगरीय प्रहरी कार्यालय रानीपोखरी (मेट्रो)मा एआइजी हरिबहादुर पालको सरुवा गरेको छ । पाल अपराध अनुसन्धान विभागमा कार्यरत थिए ।
बढुवा भएका पोखरेललाई अपराध अनुसन्धान विभाग र पाललाई पोखरेलको ठाउँमा सरुवा गरिएको हो ।
रानीपोखरीमा प्रहरी नायब महानिरीक्षक (डिआइजी) को दरबन्दी कायम रहँदै आएकोमा अब एआइजी राख्ने निर्णय सरकारले गरेको हो ।
हालै मात्र संगठन संरचना तथा व्यवस्थापन (ओएन्डएम) स्वीकृत गर्दै सरकारले एक जना एआइजीको दरबन्दी थप्ने निर्णय गरेको थियो । सो दरबन्दीमा डिआइजी पोखरेललाई बढुवा गर्ने निर्णय बढुवा समितिले गरेको थियो ।
ओएन्डएम अनुसार अब मेट्रो प्रहरीको अवधारणा हट्छ। त्यसको ठाउँमा संघीय राजधानी प्रहरी हुन्छ ।
नयाँ ओएन्डएममा काठमाडौं उपत्यकाको सुरक्षा संघीय राजधानी प्रहरी मातहत रहन्छ ।
नेपाल प्रहरीमा तीन एआइजी दरबन्दी रहँदै आएकोमा ओएन्डएममार्फत सरकारले थप एक एआइजी दरबन्दी थपेको हो ।
