काठमाडौं । सत्तारूढ दल नेपाल कम्युनिस्ट पार्टी (नेकपा) को स्थायी कमिटी बैठक आज बस्दैछ ।
यसअघि मंसिर २१ गते पार्टी कार्यालय धुम्बाराहीमा बसेको बैठक २८ गते बैठक बस्ने गरी टुंगिएको थियो ।
यसैबीच, आजको बैठक पनि पार्टी कार्यालयमा राखिए उक्त बैठकमा प्रधानमन्त्री समेत रहेका पार्टी अध्यक्ष केपी शर्मा ओली सहभागी नहुने भएका छन् ।
तर बालुवाटारमा बैठक राखिए प्रधानमन्त्री ओली सहभागी हुने बताइएको छ ।
चिकित्सकको सुझावअनुसार प्रधानमन्त्री ओलीको स्वास्थ्यलाई मध्यनजर गर्दै बालुवाटारमै बैठक राख्नुपर्नेमा जोड दिइएको हो ।
बालुवाटारमा बैठक राखिए अध्यक्ष तथा प्रधानमन्त्री ओली पनि सहभागी हुने एक स्थायी कमिटी सदस्यले नेपालफ्ल्यासलाई जानकारी दिए ।
विभिन्न आरोप लगाइएका प्रस्तावमा नभई पार्टीको आन्तरिक समस्याबारे बैठकमा छलफल हुने भएपछि ओली बैठकमा सहभागी हुन सकारात्मक देखिएको ती नेताले जानकारी दिए ।
मंसिर २१ गतेकाे स्थायी कमिटी बैठकले आजको बैठक दिउँसो १ बजे पार्टी केन्द्रीय कार्यालय धुम्बाराहीमा राख्ने निर्णय गरेको थियो ।
