काठमाडौं । प्रधानमन्त्री केपी शर्मा ओलीले बोलाएको संवैधानिक परिषद् बैठकमा सभामुख अग्निप्रसाद सापकोटा नआएपछि परिषदको बैठक स्थगित भएको छ ।
प्रधानामन्त्रीले सो बैठक बेलुकी पाँच बजेका बस्नेगरी पुनः बोलाएका छन् ।
सभामुख सोपकोटा अनुपस्थित हुँदा गणपुरक संख्या नपुगेपछि संवैधानिक परिषदको बैठक स्थगित भएको हो ।
मंगलबार बिहान ९ बजे प्रधानमन्त्री निवास बालुवाटारमा प्रधानमन्त्री ओलीले बैठक बोलाएका थिए ।
प्रधानमन्त्री, प्रतिनिधिसभाका सभामुख, राष्ट्रियसभाका अध्यक्ष, प्रधानन्यायाधीश, प्रतिनिधिसभाका उपसभामुख र प्रमुख प्रतिपक्षी दलका नेता गरी ६ जना रहने परिषदमा पाँच जना उपस्थित नभए गणपुरक संख्या नपुग्ने र त्यसले कुनै निर्णय गर्न नसक्ने भएकाले पाँच बजेसम्मका लागि स्थगित गरिएको हो । परिषदमा रहने उपसभामुख रिक्त रहेकाले हाल रहेका पाँचै जना उपस्थित हुनुपर्ने हुन्छ ।
बैठकमा प्रधानमन्त्री ओली, प्रमुख प्रतिपक्षी दलका नेता शेरबहादुर देउवा, प्रधान न्यायाधीश चोलेन्द्र शम्शेर जबरा, राष्ट्रिय सभाका अध्यक्ष गणेशप्रसाद तिमल्सिना मात्रै उपस्थित थिए ।
संवैधानिक परिषद बैठक स्थगित भए लगत्तै बालुवाटारमा मन्त्रीपरिषद बैठक बसेको छ ।
