काठमाडौं । नेपाली कांग्रेसका सांसद गगन थापाले आफैले बनाएको संविधानमा ‘कु’ हुँदैगर्दा पनि त्यस विरुद्ध चुइँक्क बोल्न नसक्ने संविधानसभाका अध्यक्ष सुवासचन्द्र नेम्वाङको ‘निरिहता’ देखेर दया लागेको बताएका छन् ।
प्रतिनिधिसभा विघटनको संवैधानिक प्रश्नमा आजबाट सर्वोच्च अदालतमा बहस सुरु हुनलागेको प्रसंग उल्लेख गर्दै नेता थापाले भनेका छन्, ‘म यतिवेला संविधानसभा अध्यक्ष सुवासचन्द्र नेम्वाङलाई सम्झिरहेको छु, जसलाई संविधानका अक्षर, त्यसको स्पन्दन अनि त्यससँग जोडिएका सन्दर्भ र त्यस समयका सभा-समिति अनि कोठादेखि चोटासम्मका बहसका बारेमा थाहा छ । मलाई लागेको थियो यो संकटमा मेरो अध्यक्षले अदालतमै उभिएर- ‘श्रीमान्, प्रधानमन्त्री ओलीले गर्नुभएको प्रतिनिधिसभा विघटन असंवैधानिक हो । मेरो नेतृत्वमा बनाएको संविधानमा यस्तो प्रावधान लेखिएकै छैन र विधायिकी मनसाय यस्तो हुँदै होइन’ भनेर सन्दर्भसहित जमेर बहस गर्नुहुनेछ ।’
नेम्वाङको मौनताप्रति असन्तुष्टि जनाउँदै नेता थापाले त्यसो गर्न नसकेकोमा असन्तुष्टि मात्र होइन गुनासोसहितको आक्रोश पोखेका छन् ।
उनले भनेका छन्, ‘अपसोच उहाँ त कसैले केही सोध्लान कि भनेर लुकेर बस्नुभएको छ, प्रश्नबाट भाग्नुभएको छ । आफैले बनाएको संविधानमा ‘कु’ हुँदैगर्दा त्यसविरुद्ध चुइँक्क बोल्न नसक्ने मेरो अध्यक्षको यो तहको ‘निरिहता’ देख्दा दया लागेको छ ।’
उनले संविधान बनाएको संविधान सभाको नेताले नै संविधानको पक्षमा उभिने साहस नगरे पनि संविधानको व्याख्या गर्ने जिम्मेवारी पाएको सर्वोच्च अदालतले संविधानको पक्षमा उभिने साहस राख्ने अपेक्षा व्यक्त गरेका छन् ।
