नेपाल कम्युनिस्ट पार्टी (नेकपा) को पुष्पकमल दाहाल ‘प्रचण्ड’–माधवकुमार नेपाल पक्षको काम सुरेन्द्र पाण्डेले गर्न थालेका छन् ।

पार्टी महासचिवको टुङ्गो लगाउन नसकेको सो समूहको आधिकारिक महासचिव पाण्डे नभए पनि भूमिका महासचिवको निर्वाह गर्दै आएका छन् । अध्यक्षमा प्रचण्ड र माधव नेपाल छन् ।

निर्वाचन आयोगले औपचारिक मान्यता नदिए पनि सो समूहले नेता नेपाललाई अध्यक्ष मान्दै आएको छ । साे समूहमा नारायणकाजी श्रेष्ठ प्रवक्ता छन् ।

प्रचण्ड–माधव पक्षले अध्यक्ष केपी शर्मा ओली र महासचिव विष्णुप्रसाद पौडेललाई हटाएको घोषणा गरेपछि महासचिव पद रिक्त  छ । तर महासचिवको विषय भने एक महिना बित्दा समेत टुङ्गो लागेको छैन ।

औपचारिक रुपमा महासचिव नतोकिए पनि नेता नेपाल पक्षका पाण्डेले प्रचण्ड–माधव पक्षको महासचिवले गर्नुपर्ने सङ्गठनका (सबैजसो) कामदेखि डकुमेन्टसनसम्मको कामसमेत गर्न थालेका छन् ।

प्रचण्ड–माधव पक्षको महासचिव पूर्वमाओवादी समूहकै हुनुपर्नेमा माओवादी पक्षको जोड  छ। शक्ति सन्तुलनका हिसाबले समेत महासचिव आफूहरू हुनुपर्ने लबिङ उनीहरूले गरिरहेका छन् । यसैले अहिलेको लागी औपचारिक रुपमा महासचिव घोषणा नगरे पनि महासचिवले गर्ने सबै जिम्मेवार  आघोषित  रुपमा तत्कालको लागि पाण्डेलाई दिइएको नेताहरु बताउँछन् ।

‘भित्री रुपमा महासचिवको भूमिकामा सुरेन्द्र पाण्डे नै हुनुहुन्छ । महासचिव पदमा आकाक्षि धेरै भएपछि सबैलाई चित्त बुझाउन नसकिने भएकाले अहिले भित्रभित्रै उहाँलाई नै जिम्मेवारी दिएर काम भइरहेको छ ’ नेता नेपाल निकट एक नेताले भने ।

पाण्डेले तत्कालीन एमालेमा लामो समय वरिष्ठ नेता झलनाथ खनालनिकट भई काम गरेका थिए । एमालेको नवौँ महाधिवेशनमा खनाल नेतृत्व तहमा सक्रिय नभएपछि पाण्डे माधवकुमार नेपालको समूहबाट महासचिव पदका उम्मेदवार बनेका थिए । तर महासचिव पदमा उनी ईश्वर पोखरेलसँग १३ मतको अन्तरले पराजित भएका थिए । 

प्रचण्ड नेपाल समूहमा पार्टी महासचिवमा धेरैले आकाङ्क्षा देखाएका छन् । तर त्यो विषयमा छलफल नै भएको छैन । साङ्गठनिक एकता टुङ्गो लगाउने बेलामा महासचिव पद पनि सचिवालय बैठकबाट टुङ्गिने सक्ने केही नेताहरूले बताएका छन् ।

तत्कालीन एमालेमा यसअघि नै उपाध्यक्ष भइसकेका भीम रावलले पनि महासचिवको दाबी गर्दै आएका छन् । यस्तै तत्कालीन एमालेका उपमहासचिव घनश्याम भूसालपनि आकाक्षि छन् । यस्तै माओ बादीतर्फबाट जनार्दन शर्मा, वर्षमान पुनलगायतले पनि महासचिवमा दाबी छाडेका छैनन् ।

अहिले तत्कालको लागि अघोषित रुपमा पूर्व एमाले पक्षबाट महासचिवको जिम्मेवारी पाएपछि पूर्व माओवादी पक्ष असन्तुष्ट देखिएका छन् । उनीहरूले आउँदो सचिवालय बैठकबाट यो विषय टुङ्ग्याउन माग गर्दै आएका छन् ।