काठमाडौं । नेकपा प्रचण्ड–माधव समूहका अध्यक्ष पुष्पकमल दाहाल प्रचण्डले केपी ओली समूहमा रहेका दुुई नेता आफूहरुतर्फ आउन लागेको बताएका छन् ।
बुधबार सो समूहले काठमडौंमा गरेको जनप्रदर्शनलाई संबोधन गर्ने क्रममा उनले उक्त कुरा बताएका हुन् । ‘केपी ओलीलाई छोड्ने मान्छेको लाम लागेका छन्, उनले भने, ‘अरु त अरु, दुईजना मन्त्री पनि फर्कन मसँग वार्तामा छन् ।’
उनले प्रधानमन्त्री केपी शर्मा ओलीले पदबाट राजीनामा दिएर पशुपतिनाथतिर जान सुझाव दिए । ‘तुरुन्त राजीनामा गरेर पशुपतितिर लाग्नुहोस्, उहाँ जनताको शरणमा भन्दा भगवानको शरणमा जानुभएको छ,’ उनले भने, ‘आफूहरुले नेपाली जनतालाई नै भगवान् मानेका छौँ । हाम्रो भगवान् नेपाली जनता हो । हामी तपाईंको शरणमा छौँ ।’
